البحر والرق وأنا .. يوميات رحّالة بالغلط



يمكن من أسوأ الاشياء اللي تمر على الانسان .. لما يوصل لمرحلة ما يلاقي احد يتكلم معاه في موضوع طبيعي انساني ماله اي علاقة بالشغل

انا نوعا ما دحين حاس اني فيها .. فقلت الحق على نفسي واتكلم هنا .. اقلّها احد بيعرف انا ايش بسوي وايش شغلي اللي الى هدا اليوم ماعرف اوصفه لأصحابي وعائلتي

 

ليا في الشغلة دي دحين 3 سنين تقريبا .. كتب ربي ان رزقي يكون في دولة ماليزيا في شرق اسيا .. وبروناي مقسم وقتي بينهم

كيف وصلت للمكان دا .. وليش اخترت الشغلة دي .. وليش لغاية دحين انا هنا ؟ .. هدي الاشياء يمكن بكتب عنها بعدين ان شاء الله .. دحين ابغى اوصف وين انا وايش يعني رق

 

كتير مرات في الفيس بوك او التويتر اكتب اني رايح الرق او جاي من الرق .. بس ماحد بيعرف معناها الا اللي شافها قبل فقلت اعطيكم فكرة

 

كلمة رق ماهي عربية .. هي مأخوذة من الكلمة الانجليزية

Rig

وكاملها

 Offshore Oil Rig

يعني بالعربي حتصير حفارات النفط البحرية .. بس بحكم اننا نستخدم الانجليزي فخلاص صرنا نسميها الرق .. بس في بعض الدول زي مصر وليبيا يسموها حفارة

 

على حسب الدولة ومكان تواجد البترول .. فممكن انها تكون بحرية وممكن انها تكون على البر .. بس حظي رماني في ماليزيا فكل البترول موجود تحت البحر

=D

هذي صورة للمنشأة أو الحفارة أو الرق بشكل عام

تخيل كدا البحر حوليك على مد النظر .. حلو ولا ؟؟

 

نجي على شغلتي .. طبعا التنقيب على البترول عملية طويلة وفيها كثير من المراحل

تبدأ بالدراسات والبحث .. ومنها يتحدد الموقع وخطة الحفر .. بعدين يجي الحفر والقراءات .. بعدها الانتاج

 

أنا وسط الطبخة دي كلها طحت في مرحلة الحفر والقراءات .. ماحدخل في التفاصيل ايش نسوي بالضبط بس احنا اللي نحفر ابار البترول ونعطي قراءات ونقولهم اذا كان في بترول أو غاز أو بس ضيعنا وقتنا ههههه

 

أكيد بيجي سؤال على خاطر اي أحد .. كيف نوصل دا المكان ؟؟

يعتمد على ميزانية المشروع نفسه .. اذا كان شي معتبر فنروح ونرجع بهليكوبتر << أول يوم ركبتها كنت متحمس هههه

وأحيانا يكون العميل بخيل فنروح ونرجع على سفينة .. بس نادرة تكون

 

 

تختلف عملية الحفر ومدتها من مكان لمكان حسب طبيعة الارض وايش نتوقع منها .. لكن بشكل عام نقعد في وسط البحر كدا بالشهور أحيانا

أكتر فترة قعدتها كانت تقريبا 5 شهور عشان نخلص بير واحد


=D أحس كدا كفاية كمقدمه .. عارف انها مملة وكلها اشياء ما تنفهم .. بس اقلّها لما اجي بشرح بعدين يومياتي يكون في فكرة عامة عن الوضع

دحين على وشك نبدأ حفر بير ان شاء الله .. دعواتكم يخلص بسرعة وعلى خير بدون اي مشاكل

وبعدها نرجع لكم ان شاء الله في يومية تانية

 

وبما إنه رمضان بكرة ان شاء الله نستغل الفرصة ونقولكم كل عام وانتم بخير .. اعانكم الله على صيامه وقيامه



🙂 أحمد

@AAJunaid

14 comments

  • Mohammed Basurrah

    معلومااات لطيفه وجميله 🙂

    اهمم شي بس مايطلع البير الي تحفرونه يضيع وقتكم فيه ويطلع فاضي خخخخ

    وانت بخير وصحه وسلامه ,, ومبارك عليك الشهر

  • محمود سالم

    الله يعينك ياخوي بصراحه حسيت فيك كثير لانني عشت تقريبا نفس ظروفك وممكن اكثر لانني سجنت ظلم ولكن الحمد لله الله فرج عني واقول لك ياخوي بحكم الخبرة اجعل لك هدف في هذا المكان لان الذي يعيش لهدف يختلف عن الذي يعيش بدونه ثم ادي الفرائض واعلم انك لست الوحيد البعيد عن الاهل والديار ولا اكثر عليك وبصراحه اثر فيني موضوعك ولا ادري ايش السر لعله نابع من القلب وعلى كل حال انا بانتظار يومياتك وخليها بسيطه باسوبك البسيط الرائع والى الامام يابطل وثابت مثل الجبل لايهزه ريح .ا

    • آمين يارب شكرا لك سيدي محمود على النصائح القيمة وعلى عيني وعلى راسي ان شاء الله بالحسبان .. وان شاء الله يتيسر الوقت وانزل جزء ثاني قريب ان شاء الله .. شرف لي تواجدك =)

  • زائرة

    سلاامن عليكم و رحمة الله ..
    مبارك عليك الشهر أخي الكريم ..
    لقد أنني تعجبت كثيراً جداً .. فلقد درسنا في مادة الجيولوجيا النفط و طرق استخراجه و لم اتخيل ابداً جو العمل في مثل هذي الاعمال و خاصة عندما تكون في عرض البحر .. !!
    يبدوا الأمر مخيفاً بعض الشيء .. أعانك الله .. و وفقك لصراطه المستقيم ..
    بإنتظار الموضوع القادم إن شاء الله .. ^_^
    في حفظ الرحمن ..

    • وعليكم السلام ورحمة الله وبركاته .. مبارك على الجميع يارب
      مخيف وممتع احيانا .. شكرا لك والله يوفق الكل
      🙂

  • مبارك عليك الشهر وكل عام وانت بخير.
    شكرا على الموضوع الشيق واتمنى لك السلامة الدائمة . لأن هذا العمل فيه خطورة. اليس كذلك. على العموم دمت بحفظ الله ورعايته. واتمنى ان اسمع المزيد عن عملك هذا. في امان الله

  • مبروك عليكم الشهر

    الحال من بعضه انا مهندس في منطقه بريه بعيد عن اهلي واحبابي
    وحاس بالغربه والوحده وانا وسط بلدي

    بالتوفيق

  • عبدالله الهزاع

    السلام عليكم

    وش نوعية عملائكم ؟

    🙂

    • وعليكم السلام ورحمة الله وبركاته عبدالله .. معليش سامحني على التأخر في الرد .. حاليا العميل اللي شغال معاه هوا توتال .. في بروناي الآن =)

  • Pingback: كوكب الرق … تدوينة صوتية/مصورة | a Semi-Photographer

  • Pingback: عن عملي أتحدث .. القراءات أثناء الحفر | a Semi-Photographer

This site uses Akismet to reduce spam. Learn how your comment data is processed.